– हेमन्त परदेशी

बम र बारुदले उडाउन सक्दैन ,

न त फलामे सांग्लाहरुले नै बाँध्न सक्छ ।

आगोको ज्वालाले जलाउन सक्दैन ,

न त हिटलरी शासनहरुले नै गलाउन सक्छ ।

मानवरुपी भौतिक शरीर मरेर जान्छ ,

तर आस्था सधै अमर रहन्छ ।

त्यसैले शहीद!

तिमीले रुनु पर्दैन ,

मृत्युको ग्लानिबोधले रत्तिभर छट्पटिनु पर्दैन ।

भौतिक शरीर बिलाएर गयो त के भयो ?

तिम्रो आस्था अझै मरेको छैन ,

र युगौ युग मर्ने पनि छैन ।

बस् फरक यति छ –

आज तिम्रो त्यही आस्था माथि स्वघोषित ठुलाबडाहरुले ,

मनपरि रत्यौली खेलिरहेकाछन् ,

मृत्यु पर्यन्त परलोकमा समेत् –

ब्रम्हलुट् मच्चाउने दिवासपनामा ,

तिम्रै आस्थाको पुच्छर् समातेर –

बैतरणी पार गर्न खोजिरहेकाछन् ।

तर ढुक्क बन शहीद!

तिम्रो आस्था अब एक्लै छैन ,

शदीयौ देखि मुकदर्शक बनेर –

इतिहासको गवाह बन्दै आइरहेको यो देस ,

अब त्यसै चुप लागेर बस्ने छैन ।

भन्नैपर्दा………….

अब सगरमाथाको शीखरमा पनि –

तिम्रै आस्थाको झन्डा फहराउनेछ ,

तिम्रो आस्थाको पुच्छर समातेर,

बैतरणी तर्न खोज्नेहरु –

बीच बाटोमा पुग्न नपाउदै ,

समुन्द्रमा अकल्पनीय सुनामी आउनेछ ।

र त्यो दिन………

सुषुप्त ज्वालामुखीको बिष्फोटसँगै ,

कहिल्यै हारमा अनुवाद नहुने –

तिम्रै आस्थाको विजय हुनेछ ।

Please follow and like us:
error0
fb-share-icon20
Tweet 20
fb-share-icon20

Leave a Reply:

Your email address will not be published. Required fields are marked *