तिमी बिना एक्लै यहाँ

तिमी बिना एक्लै यहाँ जुनी काट्न गाह्रो भा’छ
माया भन्ने चिजै यस्तो फेरि साट्न गाह्रो भा’छ ।

मन दुखे त सम्हाल्नेथे, खै के भयो विचित्रै भो
झरी परे पछि बादल फेरि फाट्न गाह्रो भा’छ ।

रङरोगन लगाएर सुन्दर पार्ने इच्छा छैन
आफ्नै मन मारी अब, फेरि ढाँट्न गाह्रो भा’छ ।

अरू बाँकी के नै छ र? परदेशमा एक्लै बस्दा
को विरानो को हो आफ्नो, फेरि छाँट्न गाह्रो भा’छ ।

धनको लोभले मन भरियो, मनको लोभ सधै खाली
देशकै नुन मिठो थियो फेरि चाट्न गाह्रो भा’छ ।

Please follow and like us:

0

20

20

20