तल तल झरिजान्छ जिन्दगी

– सुशिला निङ्लेकु

हृदयको आँचल थापेर उठाउनु
पर-पर भागीजान्छ जिन्दगी
मनको पछ्यौरीले तानी ल्याउनु
नत्र मदहोसिन्छ जिन्दगी
शितैमा फुट्छ जिन्दगी

उदासीले मुटु कट-कटिन्छ
सम्झनाले छाती बाफिन्छ
आफैले सम्हाल्नुपर्छ उदासिलाई
आफैले फकाउनुपर्छ सम्झनालाई
नत्र एकोहोरिन्छ जिन्दगी
नत्र छरप्रस्टिन्छ जिन्दगी

आवेशमा क्रोध रापीई दिन्छ
छन-भर मै सपना खरानीबन्छ
आफैले छेक्नु पर्छ,मनको आवेगलाई
आफैले बचांउनु पर्छ,अनमोल सपनाहरुलाई
नत्र धुलोसरी बन्छ जिन्दगी
नत्र बिलाई जान्छ जिन्दगी