– राजेन्द्र शर्मा
बन्द छ शहर आज
त्यसैले
मनोरम शहरका आँखीझ्यालहरुबाट
चियाइरहेका ती निश्छल मस्तिष्कहरु
विष्फोटनको कुनै अबोध ईच्छा बोकेर
सलबलाइ रहेका पाइलाहरुमा
ब्यङ्ग्य पस्कि रहेछन् ।
कति सुन्दर छन् यी
कहाली लाग्दा दृष्यहरु ?
मानव रहित स्मशान झैँ शहरका गल्लीहरु ।
बन्द छ शहर आज
त्यसैले
सडकमा पोखिएका दूध र गोलभेडाहरु
केवल प्रतीक हुन् भन्छन् ती अवोध आँखाहरु
कुनै महाप्रलयको पूर्वाभाष झैँ
शून्यबाट सुरु भएर फेरि शून्यतिर
दौडिरहेका छन् पाइलाहरु ।
बन्द छ शहर आज ।
Please follow and like us:
0
20
20
20