म बौलाएँ
कहाँ जाऊँ
उकुसमुकुस छ मन
आक्रोश कोसँग पोखूँ
बादल मडारिएपछि
घनघोर वर्षा हुनै पर्छ
असिना होस् वा पानी
भल त पक्कै बग्नेछ
म बौलाएँ
कहाँ जाऊँ
छिमेकीप्रति आक्रोश पोखूँ भने
मेरै घरका मुखियाहरू मलाई
मेरै आँगनमा चौखुर्याउँछन्
मैलाई पाता फर्काएर लडाउँछन्
हुनत तिनीहरूलाई मैले नै रोजेको हुँ
मेरै भूमि बचाउने कसम खुवाएको हुँ
म बौलाएँ
कहाँ जाऊँ
इतिहासलाई गाली गरेर
जनताको ताली खानेहरू
फेरि इतिहास दोहोर्याएर
खर्क कसरी बुझाउन सक्यौ?
म बौलाएँ
कहाँ जाऊँ
समय बदलिएछ
मैले पत्तै पाइनँ
जनताको छोरो
म तपाईंकै नरे,
यसो भन्नेहरू
अहिले तपाईंको
मुक्तिदाता नरेश
भन्दै छन्
म बौलाएँ
कहाँ जाऊँ
Please follow and like us:
0
20
20
20