तीन कृति विमोचन राप्ती साहित्य परिषद् जिल्ला शाखा रोल्पाको आयोजनामा आज लिबाङमा तीन वटा गजलसङ्ग्रहको विमोचन गरिएको छ । रोल्पा उद्योग वाणिज्य संघको हलमा सम्पन्न कार्यक्रममा चाँदनी केसीको उद्दीप्त मन गजलसंग्रहको विमोचन कार्यक्रमका प्रमुख अतिथि एवं प्रगतिशिल लेखक संघ नेपाल केन्द्रीय सदस्य गौरीकिरण डाँगीले गर्नुभयो । त्यस्तै विराज पुनमगरको तिमी मात्र तिमी गजलसंग्रहको विमोचन ललित साहित्य परिषद रोल्पाका अध्यक्ष ओम पन्छीले गर्नुभएको थियो भने डीबीमगर स्वेद, प्रशान्त मगर, गायत्री रोकामगर र निर्दोष माकुरोको संयुक्त गजलसंग्रह अंकुराए पल्लबीको विमोचन नेपाली लेखक संघ रोल्पाका अध्यक्ष दामु मर्सिफूलले गर्नुभएको थियो । कार्यक्रममा तिमी मात्र तिमीको समीक्षा केवि विरही, अंकुराए पल्लवीको समीक्षा ओम पन्छी र उद्दीप्त मनको समीक्षा दामु मर्सिफुलले गर्नुभएको थियो । कार्यक्रममा जलजला साहित्य परिषद् रोल्पाका अध्यक्ष दिपेश पराइ विष्ट लगायतले मन्तव्य दिनुभएको थियो भने कार्यक्रममा चाहना शर्मा, अमर जिएम अर्पण, नारायण रेग्मी जिज्ञासु, सुकम मगर, सिर्जना सेन, गायत्री रोकामगर, प्रशान्त मगर लगायतले गजल वाचन गर्नुभएको थियो । राप्ती साहित्य परिषद् जिल्ला शाखा रोल्पाका अध्यक्ष डी.बी. टुहुरोको अध्यक्षतामा सम्पन्न कार्यक्रमको सञ्चालन सहसचिव खेमराज गाउँलेले गर्नुभएको थियो । खेमराज गाउँलेरखुमेल, रोल्पा Cont : +977-9847850902
1
20
20
20